Mir plangen dës Form vun Newsletter fir esou vill ewéi méiglech Informatiounen am Virfeld vum Camp mat de Chef/Gruppechef ze deelen. Et ass net geduecht dës Newsletter un d’Avex oder un d’Eltere weider ze leeden. Dëst kéint zu Confusiounen féiere wëll hei och vill reng “intern” Informatiounen dra stinn.

Bis elo sinn d’Avex aus 43 Truppen ugemellt, eng ronn 700 Avex, Chef a Staff.

De Präis vum Camp ass fixéiert op 280€ pro Avex an 200€ fir Chef a Staff. Am Präis mat dran ass de komplette Programm fir d’Avex, de Ravi fir Moies, Mëttes an Owes, d’Sanitäranlagen, d’Infirmerie, eng Partie Gadgete fir d’Avex, ... Dir krut/krit elo den 1. Acompte ze bezuelen, dësen ass och net remboursabel.

D’Virbereedungen am Topstaff lafe wéi geplangt a lues a lues si mer prett wann am Juli den nächsten nationalen Avex-Camp lass geet.

Den 22. Abrëll ass onsen nächste Staffdag. Hei ass jiddereen aus dem Staff invitéiert fir zesummen ze schaffen awer och fir einfach gemittlech zesummen ze sinn an puer flott Momenter ze verbréngen. Weider Informatiounen iwwer genau Zäit a Plaz kommen an enger separater Mail no.

Bass du am Staff an nach Schüler, Student oder Chef vun enger Branche da bass du automatesch als Member vum Verband “Onfall-Verséchert”.

Erfëlls du d’Krittären uewendriwwer net, da bass du net “Onfall-Verséchert”. Dee Moment kanns du dech awer zousätzlech versécheren iwwert eng privat Onfall Versécherung déi d’LGS mat hirem Partner LaLux kënnen ofschléissen. De Präis heivunner läit bei 10€. Bass du heirunner interesséiert oder hues nach Froen, da mell dech bei sekretariat@terraviva.lu.

Wann s du wëlls vum Congé Jeunesse profitéieren, da muss du de Formulaire (Chefbox oder SNJ) ausfëllen a vum Patron accordéiere loossen an duerno an d’Géisserei schécken (per Post oder un sekretariat@lgs.lu oder an der Chefbox eroplueden).

Den Délais heifir ass den 1. Mee 2023. Fir Froen heizou went dech w.e.g. direkt un d’LGS Sekretariat.

Du hues dech gemellt fir am Staff ze hëllefen, villmools Merci dofir. Mee villäicht hues de jo nach ee Bekannten, een aus dengem Grupperot, ... deen och interesséiert wier fir am Staff ze hëllefen.

Hei ass eng Oplëschtung wou mer nach Hëllef kënne gebrauchen.

All Hëllef gëtt gebraucht fir den Avex ee flotten Dag voller Atelier’en um Camp ze bidden :

• Hues du eng Iddi fir een Atelier an deen um Camp ze encadréieren?

• Hues du Loscht den Dag selwer een Dag ze encadréieren?

Mell dech beim lis.backendorf@education.lu.

4 Elementer ass Thema vum Camp, an déi ganz Animatioun dréint em déi 4 Elementer. Hues du Loscht dech un der Animatioun ze bedeelegen, da mell dech beim Xavier Létalon xavier.letalon@lgs.lu.

Mir sichen :

• motivéiert Leit fir an der Veillée, oder am mat-organiséieren interesséiert sënn

• Museker fir d‘Camp-Lidd

• All Material dat d’Scouten sou hunn fir Bühnen (Dampmaschinn, Luuchten, Mikro, etc...)

Mir sichen nach Verstäerkung an eisem Avex-Bar-Team.

Sief derbäi an zauber den Avex den een oder anere Cocktail an der Avex-Bar, ënnerstëtz eis beim Partyfood-Workshop oder hëllef eis beim Shop. Ob just e puer Stonnen, Deeg oder de ganze Camp all Hëllef ass Wëllkomm. Dëst souwuel an der Mëttesstonn, wéi och um Feierowend a v.a. nach owes den 19.07 an 20.7.

Wann s du bereet fir dës Aventure bass, mell dech beim nicole.turmes@lgs.lu.

Hues du Loscht e puer Deeg um Mini Camp ze hëllefen a mat de Kanner ënner 11 Joer flott Aktivitéiten ze maachen. Da mell dech beim : poeckes.manon@education.lu.

Ganz speziell siche mer fir dëst Joer och e puer Leit déi um Camp e klenge Filmprojet wëlle starten. Bass du begaabt eng Kamera ze bedéngen an och de Schnëtt vum Film ze maachen? Dann zéck net a mell dech op pr@terraviva.lu.

"Fort Terraviva" ass den Numm vun engem groussen Escape Spill. Den Numm "Fort" steet fir de Raum, wou wärend engem ganzen Dag ongeféier 120 AvEx flott a spannend Abenteuer; Aufgaben a Rätsel musse meeschtere resp. léisen. Beim "Fort" inspiréiere mir eis um "Fort Boyard", enger Sendung op der franséischer Télé.

Jo, dir hutt richteg verstanen, mir probéieren eng Festung als Escape Room ze bauen.

Fir dëse Fort, dee mir fir de Camp aus Holz, Paletten, Juchten, ... bauen, hunn mir vum 13. – 17. Juli 2023 Zäit, mat genuch Hëllef an engem Plang, absolut realiséierbar.

Ofgerappt gëtt eise Fort vum 27. – 30.7.2023.

Fir des "verréckten Iddien" brauche mir natierlech vill a gutt Leit; also DECH! Wou genau brauche mir Hëllef? a wien?

Mir brauche Leit, déi punktuell beim Opriichten/Ofriichten an/oder wärend dem Camp dobäi sinn. Jiddereen ass also wëllkomm; punktuell; wärend eenzel Deeg oder de ganze Camp ...

Fir dëse Projet unzegoen, ass et wichteg mat Zäit ze wëssen, wéi vill Mataarbechter mir hunn.

Falls du elo interesséiert bass, da mell dech w.e.g sou schnell wéi méiglech beim Tom Lahr via tom.lahr@lgs.lu un.

Mir siche Leit, déi bei der Planung, beim Opriichten an/oder beim Ofriichte vun der Olympiad hëllefen.

Wëlls du dësen Challenge unhuelen, da mell dech beim Fränz Dording fraenz.dording@gmail.com.

Mir brauche fir an de Sous-Camps propper Frigoen. Wann dir also am Grupp (oder privat) esou een hutt dee mir fir d’Dauer vum Camp kéinte geléint kréie géif dat ons hëllefen. Mellt iech dofir op programm@terraviva.lu.

Da brauche mer fir de "Fort Terraviva" och nach eng Partie Juchten, an zwar vum 13. – 28. Juli. Falls äre Grupp eng oder méi Juchten huet, an eis des fir den Avex Camp ausléine kann, kennt dir iech fir weider Detailer beim Tom Lahr ënnert tom.lahr@lgs.lu mellen.

De Sous-Camp Äert brauch är Hëllef! Mir planze gären op eisem Sous-Camp Kraider fir de ganze Camp un. Wann dir also iergendwellech Kraiderplanzen hutt déi der net méi braucht oder wëllt matbréngen, wiere mir ganz frou. Dir musst och net onbedéngt eng ganz Planz matbrénge wann der är Kraider nach wëllt halen, e Stéck vun der Planz (genuch Blieder a Wuerzelen) geet natierlech duer. Mir soen iech schonn am viraus Merci fir är Hëllef a bieden iech ären Avex dës Info och matzedeelen.

Fir d’Atelieren brauche mer nach (propper) Pizza Këschten. Wann der d’Méiglechkeet hutt där ze sammelen da mellt iech w.e.g. beim : lis.backendorf@education.lu.

Den 18. Mäerz 2023 gëtt an engem Privat-Bësch zu Lëtzebuerg Konstruktiounsholz geschnidde fir de Camp. Nom Camp geet dëst Holz op de Kuelbécherhaff. Wann s du interesséiert bass fir hei eng Hand mat un ze paken da mell dech bei infra@terraviva.lu.

 terraviva.lu        info@terraviva.lu

Bescht Guiden- a Scoutsgréiss

Fir den Topstaff

Romain